Mayor Gica gidakop, nakapiyansa

CEBU, Philippines – Gidakop sa hepe sa Dumanjug Police Station si Dumanjug Mayor Efren Guntrano “Gungun” Gica sa panimalay niini sa Barangay Sima sa maong lungsod kagahapon sa hapon.

Ang pagdakop pinaksikad sa warrant of arrest nga giluwatan ni Judge Reginal Fuentebella sa Regional Trial Court Branch 59 sa San Carlos City, Negros Occidental.

Kini may kalabutan sa kasong kalapasan sa Section 3 sa Republic Act 3019 o Anti-Graft and Corrupt Practices Act.

Ang hepe sa kapolisan sa Dumanjug nga si Major Ardiolito Cabagnot maoy nisilbi sa warrant of arrest batok ni Gica.

Si Gica nakapiyansa ra hinoon kagahapon og P30,000 sa korte, matud ni Police Master Sergeant Nelson Mendaros.

Gikompirmar sa Cebu Provincial Police Office Director, Police Colonel Rhoderick Mariano, ang pagdakop kang Gica.

Ang kaso napasaka sa korte niadto pang Nobiyembre 12, 2019.

Ang amahan ug abogado ni Gica nga si Atty. Edgar Gica nga nahinabi sa Banat News nagkanayon nga politika ang nagpaluyo sa pagpadakop sa mayor.

Matud ni ni Atty. Gica nga nakuratan nalang sila nga adunay kasong graft and corruption ang mayor ug didto gisang-at sa Dakbayan San Carlos.

“It is obvious politically motivated,” matud ni Gica.

Gihimakak ni Atty. Gica nga adunay kalapasan ang mayor ilabi na ang reklamo nga gisang-at batok niini ug siya nagtuo nga may kalabutan kini sa pagkuha sa usa ka sikat nga artista nga maoy naghatag og lingaw sa kapistahan sa Dumanjug niadtong 2016.

Niduso og letter of undertaking si Mayor Gica ngadto sa RTC Barili nga dawaton ang piyansa nga P30,000 alang sa iyang temporaryo nga kagawasan bisan pa man nga anaa sa Dakbayan sa San Carlos gisang-at ang kaso. /GMR (BANAT NEWS)