Nag-offer og ‘extra service’ gironda

CEBU, Philippines — Unom ka tawo, duha kanila mga lalaki ang naluwas sa mga awtoridad samtang duha nga mga suspetsadong gituohang mga bugaw ang gidakop sa usa ka simultaneous nga entrapment ug rescue operation nga gipahigayon diha sa duha ka massage parlors diha sa Barangay Mabolo ug Barangay Cogon-Ramos sa Dakbayan sa Sugbo tungod kay giingong nag-offer sila og ‘extra service.’

Ang usa sa mga massage parlor mao ang La Esperanza Foot Body Massage nga nahimutang sa MJ Cuenco Street sa Barangay Mabolo, Cebu City. Gidakop ang biyuda nga si Marlene Moneba Saceda, 60, taga Barangay Maribago, Dakbayan sa Lapu-Lapu nga gituohang bugaw.

Sa ikaduhang massage parlor, nadakpan sab si Nelsie Yetim Timon alyas Maria Nicole Dela Cruz Albarico.

Ang entrapment operation gihimo subay sa kampanya sa Women and Children Protection Desk (WCPD) batok sa prostitusyon.

“Kining among operation karon regarding lang gihapon ni sa anti-trafficking ug command guidance against prostitution,” Si Police Lieutenant Colonel Erlinda Mayam, WCPD Chief sa Cebu City Police Office miingon sa mga reporters.

Ang entrapment operation gipahigayon mga alas 8:20 sa gabii human nila nakompleto ug nakompirmar ang report nga kining maong massage parlors gigamit sab nga prostitution den.

Sigun ni Mayam nga base sa ilang nadawat nga impormasyon, gawas sa naandan nga pagmasahe nagtanyag sab og extra-service ang ilang mga therapist alang sa lawasnong kalipay.

“Kabahin ni sa reported nga spa nga ni-engage ug prostitution, gihimo nilag prostitution den ang ilang spa,” si Mayam miingon.

Giingong P500 pataas depende sa masabotan sa customer ug sa masahista ang transaksyon.

Matod pa ni Mayam, si Saceda ug Albarico maoy tigdawat sa mga kita sa mga therapist ug maisip kini nga ‘accessory’ sa krimen.

Ang naluwas nga mga therapists nag-edad gikan sa 21 anyos pataas ug na-turnover na ngadto sa DSWD samtang ang mga gidakop gikatakdang pasakaan og kaso karong adlawa samtang temporaryong gitanggong sa CCPO.

Si Mayam nagkanayon nga maghimo pa sila dugang nga imbestigasyon pagsuta kun nasayod baa ng tagiya sa maong mga masahian sa prostitusyong nahitabo sa ilang establisamento. /IBM (BANATNEWS)