Cebu Caritas nag re-launch sa health services program

CEBU, Philippines — Ang Cebu Caritas Incorporated sa Archdiocese of Cebu subling nilusad sa ilang health and program services kagahapon diha sa ilang building sa P. Gomez Street, Dakbayan sa Sugbo.

Matud ni Padre Alex Cola, Jr., chairman sa Commission on Service ug Presidente sa Cebu Caritas Inc, nga nag re-launch sila sa ilang programa tungod kay kaniadto sa adlaw nga Huwebes lang ngadto sa Biyernes ang ilang free clinic apan karon gikan sa Lunes hangtud sa Biyernes na ang ilang pag check-up sa mga bata, kababayen-an ug uban pa.

Ang Cebu Caritas nag-cater sa tulo ka butang nga mao ang health diin free-clinic sa mga bata, babaye, mga adunay problema sa mata, cleaning sa ngipon ug uban pa.

Adunay education diin 24 na ka tinun-an ang naka-graduate nga scholar sukad nga gibuksan kini niadtong 2015 ug lakip usab sa humanitarian nga nagtabang sa mga lugar nga giigo sa katalagman ug mga nasunogan. Giingong kadaghanang anaa sa Cebu Caritas mga volunteer nga nitabang sa mas labing nanginahanglan.

Gawas sa Clinic sa Cebu Caritas mobisita usab sila sa mga parokya nga mas labing nanginahanglan alang sa mga ipahigayon nilang mga medical ug dental mission.  /BDB (BANATNEWS)