Lima ang high compliance sa road clearing sa Sugbo

CEBU, Philippines — Lima lang sa 53 ka Local Government Units sa Sugbo ang nakakuha og “high compliance” sa kamanduan sa Department of Interior and Local Government sa paghawan sa kadalanan.

Kini mao ang Dakbayan sa Bogo ug Naga ug mga Lungsod sa Barili, Liloan ug Samboan.

Base sa assessment and validation ratings sa DILG Memorandum Circular 2019-121, ang high compliance nagpasabot sa 91 hangtud 100 percent nga ratings.

Unang gipahibawo sa DILG ang pito ka LGU sa Sugbo nga hagbong sa pagtuman sa kamanduan ni Presidente Rodrigo Duterte nga mao ang Dakbayan sa Carcar ug mga Lungsod sa Badian, Carmen, Compostela, Ginatilan, Moalboal, ug Pinamungajan.

Ang pito nakakuha og ubos sa 70 percent nga ratings samtang 24 o dul-an sa katunga sa mga LGUs sa Sugbo ang nakakuha og medium compliance sa score nga 81 hangtud 90 percent ratings.

Kini mao ang Dakbayan sa Sugbo, Mandaue ug Talisay, ug mga Lungsod sa Alcantara, Alcoy, Argao, Bantayan, Boljoon, Borbon, Catmon, Consolacion, Cordova, Dalaguete, Dumanjug, Madridejos, Malabuyoc, Oslob, Poro, Ronda, Santa Fe, Santander, Tabuelan, Tuburan ug Tudela. Ang nahabiling 17 ka LGUs nakakuha og low compliance nga dunay score nga 70 ngadto sa 80 percent ratings nga gilangkuban sa Dakbayan sa Lapu-Lapu, Danao, Toledo, ug mga Lungsod sa Alegria, Aloguinsan, Asturias, Balamban, Daanbantayan, Medellin, Minglanilla, Pilar, San Fernando, San Francisco, San Remigio, Sibonga, Sogod ug Tabogon.   

Matud ni DILG-7 Director Leocadio Trovela nga kadtong hagbong nga mga LGUs ang hatagan og higayon nga makaesplikar sa ilang habig sa higayon nga isyuhan na sila og show cause orders sa ulohang buhatan. “Five days is sufficient time to explain. To be fair, nag-effort din naman sila, except that baka may mga difficulties,” matud niya.

Nalipay hinoon si Trovela nga 91 porsyento sa 132 ka lungsod ug siyudad sa Central Visayas ang pasado sa validation.

“At least nakapasa. Mataas na yung 91. Ang hirap kaya nitong road clearing,” matud niya.

Gipasabot usab ni Trovela nga kinahanglang molihok ang mga LGUs nga nakakuha og “medium compliance” sama sa Dakbayan sa Sugbo aron mosaka pa sa “high compliance.”

“Kulang pa rin siya kung sa directive ng President ang titingnan. Baka kasi yung medium maging low kasi baka bumalik yung mga na-clear,” matud ni Trovela.

Matud ni Trovela nga tinguha sa administrasyon nga mosustenir ang kahawan sa kadalanan hangtud sa kabarangayan.

Gidasig niya ang publiko nga motaho sa ilang buhatan sa mga ilegal nga istraktura nga anaa sa kadalanan pinaagi sa Local Government Monitoring and Evaluation Division nga may telepono 253-5473 ug 253-5471. (/GMR)(BANATNEWS)