‘Traffic crisis’ gideklarar sa Provincial Board
CEBU, Philippines — Nideklarar ang Provincial Board nga adunay “traffic crisis” sa Probinsiya sa Sugbo tungod sa padayon nga problema sa trapiko nga nakahasol sa mga commuters.
“… the traffic and congestion in Metro Cebu as manifested in the debilitated long hours of daily commute and land travel have assumed the magnitude and degree of a public calamity,” pagbasa sa resolusyon ni Bokal Glenn Soco, kinsa maoy chairman sa PB committee on planning and development ug commerce and industry.
Matud ni Soco nga moabot sa P1.1 bilyones ang nawala sa ekonomiya sa Metro Cebu tungod sa trapiko.
Dugang ni Soco nga pipila sa nakatampo niini mao ang baha nga moabot na sa national roads tungod kay puno ang mga drainage sa basura; ang walay disiplina sa mga driver ug dili pagsunod sa balaud sa trapiko; pag-parking sa kilid sa dalan ug uban pang mobabag sa dagan sa mga sakyanan.
Sa iyang resolusyon si Soco niawhag nga kinahanglan ang tanang sektor mohimo og paagi aron masulbad ang nagkagrabe nga problema sa trapiko sa probinsiya.
Ang maong resolusyon naaprobahan kini atol sa regular session sa PB kagahapon.
Wala hinoon sa resolusyon ni Soco kun unsa nga mga solusyon ang mamahimong mapatuman aron masulbad ang maong problema.
Si Gobernador Gwendolyn Garcia nagkanayon nga mas maayo nga motutok sa pamaagi kung unsaon pagsulbad sa trapiko.
Usa sa gisugyot sa gobernador ang pagbutang og U-turn slots sa pipila ka dalan ilabi na ang kasagaran maabtan sa ubay-ubay nga mga sakayan ug “roundabout” nga klase sa dagan sa trapiko aron nga usa ra ang direction sa sakyanan sa usa o pipila ka linya sa usa ka central island ug paghatag og priority sa circulating flow sa traffic sama sa Fuente Rotunda. (/GMR)(BANATNEWS)
- Latest
