5-anyos negatibo sa meningococcemia

CEBU, Philippines – Negatibo sa meningococcemia ang blood test sa 5-anyos nga bata nga unang gidudahan nga adunay sakit niini nga namatay.

Kini ang gibutyag ni Dr. Cristina Giango, hepe sa Provincial Health Office.

“We received a report nga ang result sa iyang blood test is negative sa meningococcemia, katong reported nga meningococcemia nga suspect sa Consolacion, so ang resulta sa blood test is negative. Maybe it’s just a viral infection or other infection,” matud ni Giango. Unang nadawat nga taho sa PHO nga adunay 5-anyos nga bata nga gi-admit sa tambalanan sa Dakbayan sa Mandaue hangtud nga niabot sa usa ka daku nga pribadong hospital sa maong dakbayan ug didto gikuhaan og laboratory examination ug gidala dayon sa Vicente Sotto Memorial Medical Center ug nakuhaan og blood test apan namatay.

Ang meningococcemia usa ka sakit nga gidala sa usa ka kagaw nga gitawag nga neisseria meningitides kun diin airborne ang transmission.

Pipila sa mga sintomas niini ang grabeng hilanat ug rashes.

Kasagran ig-on sa maong sakit ang hinay nga immune system.

“Makuyawan ta kay moabot man sa atong brain ang kagaw. Ang kagaw naa man sa blood. Kung asa ang flow sa blood pwede siya madala adto didto,” matud ni Giango.

Iyang giawhag ang publiko nga likayan ang daghang tawo nga lugar ug kinahanglan ang proper hygiene ug tarung nga pagkaon ug sakto nga pag-inom sa tubig aron dili dali nga matakdan sa maong sakit.

Sa Sugbo matud ni Giango, kaniadto adunay natala nga usa o duha ka kaso sa meningococcemia apan pipila ka katuigan ang nilabay wala nay natala nga maong sakit. (/GMR)(BANAT NEWS)