Libreng school supplies, uniporme giduso
CEBU, Philippines — Giduso sa usa ka konsehal sa Dakbayan sa Sugbo ang libre nga tinuig nga mga gamit sa eskwelahan ug uniporme sa tanang pre-school hangtud grade 12 nga mga tinun-an sa mga publikong elementarya sa siyudad. Gisugyot ni Konsehal Raul Alcoseba ang iyang una nga ordinansa nga anaa pa sa committee on laws, ordinances, and styling.
“It has been observed that in the City of Cebu, even in a public school where children are given free education, unfortunately, do not go to school as their parents cannot afford to buy basic school supplies and uniforms for their needs,” sigun ni Alcoseba.
Sumala sa Department of Education Cebu City Division nga dili mominus 110,000 ka estudyante ang naka-enrol sa 66 pangpubliko nga tunghaan sa siyudad niadtong Hunyo 2019.
Gisugyot ni Alcoseba nga ang Local School Board makig-alayon sa DepEd Cebu City Division ug City Council alang sa pagpatuman sa ordinansa kung kini maaprobahan sa konseho ug ni Mayor Edgardo Labella.
Ang LSB gitahasan usab nga maghimo sa implementing rules and regulations sulod sa tulo ka buwan human mapasar ang ordinansa.
Matud ni Alcoseba nga daghang estudyante ang gikataho nga napugos nga manarbaho sa bata pa kaayo nga edad aron matabangan ang ilang mga ginikanan nga makakwarta tungod kay ang ilang mga ginikanan dili makapaeskwela kanila.
Buot niya nga ang siyudad maggahin og pundo alang sa maong katuyoan matag tuig. (GMR) (BANATNEWS)
- Latest
