Clamping sa sakyanan ipatuman sa Talisay
CEBU, Philippines – Human sa usa ka buwan nga pagpahibawo sa publiko, ipatuman na sa City of Talisay-Traffic Operation Development Authority (CT-TODA) ang pag-clamp sa mga sakyanan nga pataka lang og parking. Matud ni Jonathan “Joy” Tumulak, traffic czar sa siyudad, nga sa sa pagkakaron dili na makapataka og parking ang mga sakyanan.
Usa sa mga nakatrapik sa dakbayan mao ang mga sakyanan nga iparada lang sa kilid sa karsada.
Ang malapason sa lagda makamulta og P1,000 diin P500 alang sa ilegal nga parking samtang P500 alang sa pagkuha sa clamp.
Asoy pa ni Tumulak nga dili pa gyud hingpit nga ma-release ang sakyanan kun makit-an nga aduna pay laing kalapasan ang drayber ug kinahanglan nga sulbaron una ang tanang penalty una ma-release.
Sa pagkakaron adunay 15 ka clamps ang CT-TODA nga 24-oras magtuyok-tuyok sa siyudad.
Awhag ni Tumulak nga kadtong mga establisemento mangita gyud og lugar nga kaparkingan sa ilang kliyente aron dili maapektuhan ang ilang negosyo. (/GMR)(BANAT NEWS)
- Latest
