Magpale, 5 bokal nanamilit na
CEBU, Philippines — Ihulagway ni outgoing Vice Governor Agnes Magpale nga “professional” “productive” ug “successful” o malampuson ang 14th Sangguniang Panlalawigan sa Sugbo.
Atol sa uwahing regular session ug recognition rites sa SP kagahapon, si Magpale nagtuo nga nahimong “fair” ang pagtuki sa Provincial Board sa mga issues sulod sa upat ka tuig.
Apil niini ang pagpalit sa heavy equipment nga nahimong usa sa dakung isyu nga gituki sa SP.
“No issue under deliberation was rigged by reason of the strength of numbers. The issue on the purchase of heavy equipment, for one, which went through a thorough deliberation prior to its approval, proved beneficial as the purchased equipment were used during the retrieval operations for the landslide victims in Naga City,” matud ni Magpale.
Sa 17 ka sakop sa SP apil na ang bise gobernador, unom kanila ang outgoing nga sila si Bokal Alex Binghay, Sun Shimura, Jude Thaddeus Sybico, Glenn Bercede ug ang pangulo sa Philippine Councilors League nga si Earl Tidy Oyas ug si Magpale.
Gihatagan sila og pasidungog sa ilang mga nalampos isip mga magbabalaud sama sa mga napasar nga resolution, committee reports ug ordinansa.
Tagsa-tagsa usab silang nihatag sa ilang mga mensahe diin ila gisaysay ang ilang kaagi isip mga bokal ug nagpasalamat sila sa mga nisuporta kanila ug panaghigala nga naumol atol sa panerbisyo.
Si Vice Governor-elect Hilario Davide III nagpasalamat sab sa mga bokal sa kontribusyon niini alang sa Lalawigan sa Sugbo ubos sa iyang administrasyon.
Matud ni Davide nga bisan adunay mga bangi kaniadto, nagtuo si Davide nga kaayuhan sa mga Sugboanon ang gusto sa mga bokal.
Si Davide atol sa iyang pakigpulong nagkanayon nga gawas nga dili siya mahimong “obstructionist”, ganahan siya makighigala ni Governor-elect Gwendolyn Garcia.
“Gusto ko makig-friend niya pero og dili siya di pud ko og mamugos,” matud ni Davide. (BANAT NEWS)
- Latest
