Naghikog human biyai sa kapuyo
CEBU, Philippines – Usa ka 30-anyos nga lalaki ang naghikog human kini biyai sa iyang kapuyo diha sa Sitio My Flower, Barangay Duljo Fatima, Dakbayan sa Sugbo niadtong Martes sa kadlawon.
Ang naghikog giila nga si Jose Manuel Arilto, residente sa maong dapit.
Ang kapolisan sa Mambaling Police Station pinangulohan ni Police Captain Francis Renz Talosig nakadawat kini og report gikan sa barangay hall sa nahisgutang barangay kabahin sa maong hitabo ug daling niresponde.
Sa imbestigasyon sa kapolisan ang manghud nga babaye ni Jose nga si Jonian Kyle ang unang nakadiskubre niini nga nagbitay diha kilid sa main door sa ilang balay diin ang liog niini aduna nay higot nga pisi.
Si Jonian daling nisumbong ngadto sa ilang inahan nga naghikog ang iyang maguwang.
Ang maong inahan daling nanawag og tabang ngadto sa ilang barangay ug ang taga barangay ni-report usab dayon ngadto sa mga polis.
Niresponde ang Cebu City Emergency Medical Services nga gipangulohan ni Rey Apostol.
Matud sa inahan ni Jose nga pipila na kini kahigayon nga nisuway sa paghikog dihang gibiyaan kini sa iyang kapuyo ug kanunay na usab kining magul-aaon. (/BDB)(BANAT NEWS)
- Latest
