Guardo mosuporta ni Labella

CEBU, Philippines — Duha ka semana sa dili pa mo-asumir sa katungdanan si Mayor-elect Edgardo Labella nakakuha na kini og suporta sa usa sa mga konsehal sa Bando Osmeña Pundok Kauswagan (BOPK) nga si Konsehal Jerry Guardo.

Pormal niyang gipahibawo ang pagsuporta kang Labella kagahapon subay sa unang pamahayag sa bag-ong mayor nga bukas kini pag-akomodar sa mga BOPK nga konsehal gumikan kay gusto niya og inclusive governance.

Buot si Guardo nga consistent siya sa pagsuporta sa mayor nga mapili sa maong posisyon.

Si Guardo gikan sab sa Barug-PDP-Laban nga naila kaniadto nga Team Rama. “History would show that during the term of former mayor Mike Rama, I supported him. Same support I gave to Mayor Osmeña during his incumbency, so that he can implement his plans and programs for the City,” matud ni Guardo.

Giklaro ni Guardo nga wala’y nikombinsir kaniya sa paghimo sa maong desisyon sa pagsuporta kang Labella kun dili personal kini niyang desisyon sanglit 11 ka adlaw nalang mapupos na ang iyang termino isip konsehal sa siyudad.

“Nahuman naman ang election, ato nalang suportahan og unsa’y plano ug programa ni Mayor Edgar Labella,” dugang sa konsehal.

Human sa termino ni Guardo, mas motutok kini sa iyang negosyo ingon man sa iyang pamilya.

Samtang ang kaalyado sa BOPK nga si Konsehal Sisinio Andales nitahud sa desisyon ni Guardo bisan kini nasurpresa apan dili makaapektar sa kinatibuk-ang sa ilang grupo.

“I respect his opinion as long as there is no consideration involved although it is too early to devolve his preference at this point in time,” matud ni Andales. (GMR) (BANAT NEWS)