Hubog napalgang naglutaw sa kadagatan sa Cansojong

CEBU, Philippines — Senior citizen nga hubog ang napalgang patay na samtang naglutaw-lutaw sa kadagatan sa Canton Beach sa Barangay Cansojong, Dakbayan sa Talisay kagahapon sa kadlawon.

Ang namatay nailhan nga si Benjamin Lagahit, 62-anyos, minyo ug nagpuyo sa Sitio Base, Brgy. Cansojong sa naasoy nga siyudad.

Ang hepe sa tanod sa maong barangay nga si Joel Vega maoy mitawag sa kapolisan labot sa maong insidenti.

Sa pag-abot sa mga polis, ila nang nakita si Lagahit nga nag-ubo  ug naglutaw nga wala nay kinabuhi.

Si Paul Base nga nanagat mga alas 11 sa gabii maoy unang nakakita sa lawas ni Lagahit apan wala niya kini panumbalinga.

Hangtud nga si Mario Cañon uban sa laing mananagat, mialsa sa ilang pumpboat paingon sa dagat, nakamatikod sa lawas sa tawo nga nag-utaw-utaw.

Dali nila kining gipahibawo ngadto sa hepe sa mga tanod.

Ang asawa sa namatay nga si Bernadine, mitataw nga iya na untang gisirad-an ang ilang paninay nianang pagkagabii human mag-inom ang iyang bana ang higala niini. Hinungdan nga siya natingala sa gidangatan sa iyang bana.

Mirekomendar ang kapolisan nga ipaubos sa autopsy ang patayng lawas ni Lagahit aron masuta gyud ang hinungdan sa kamatayon niini.

Apan sa pagkakaron, sila nagtuo nga nalumos gyud kini gumikan sab sa iyang kahubog. (/DILT)(BANATNEWS)