Duha ka 18-anyos gipamusil

CEBU, Philippines — Babaye ug lalaki nga nag-edad og 18-anyos, nanga-angol human gipamusil sa may Sitio Caimito, Brgy. Mapaca sa Lungsod sa Compostela, niadtong Sabado sa kaadlawon.

Ang mga biktima giila nga silang Kelvin Aton, taga Brgy. Cotcot, Compostela ug si Jane Cheska Banzon, taga Yati, Liloan.

Ang hepe sa Compostela Police Station nga si Police Captain Ian Macatangay nagkanayon nga si Banzon nag-angkas sa motorsiklo ni Aton paingon sa Liloan.

Giingong gikan ang duha nga nagcheck-in sa usa ka beach resort sa Compostela ug samtang sila nagbiyahe, giingong gipusil sila sa nagsunod nga mga mamumuno.

Naigo sa abaga si Aton nga maoy hinungdan nga natumba ang ilang motorsiklo ug nagkapangos-pangus si Banzon.

Human sa pagpamusil, nisutoy ra sab og lahos ang tulo ka mga mamumuno nga nag-angkasay sab og motorsiklo.

Kasamtangang gisuwayan pa karon sa mga polis kon nahinumduman ba ni Banzon ang mga nawong sa mga suspek sanglit giingong ang drayber ra sa motor maoy nagsul-ob og helmet.

Sigon ni Macatangay mga love triangle ang ilang gitan-aw ug posibleng giatngan sila nga mogawas sa resort.

“Bag-o ra nagkaila ang babaye ug lalaki. Dili sila uyab pero nikuyog ra sad ang babaye,” dugang ni Macatangay. (/DILT)(BANATNEWS)