Sugat sa Mingla nakatandog sa mga nanan-aw

CEBU, Philippines — Ang presentasyon sa pagkabanhaw ni Hesuskristo sa Lungsod sa Minglanilla karong tuiga mas halangdon kon itandi sa mga miaging tuig.

Si Vice Mayor Robert Selma mihulagway nga ang Sugat sa Kabanhawan malampuson kay natandog ang mga kasingkasing sa mga tawong misaksi niini.

Ang presentasyon nagsugod sa usa ka away taliwala sa mga anghel ug ni Satanas, gisundan og sayaw ug dayon ang pagkabanhaw ni Hesus nga milungtad og usa ka oras.

Gihimo ang maong kalihukan sa hawanan sa Minglanilla Central School nga gisugdan og Santos nga Misa mga alas dos sa kadlawon kagahapon. Ang artistic director sa Sugat sa Minglanilla nga si Marvey Caño miingon nga 500 ka mga anghel, aktor, ug dancers ang naglangkub sa maong presentasyon.

Siya miingon nga midugang sila og special effects alang sa pagpalambo sa presentasyon karong tuiga ug wala silay dakung kausaban nga gihimo kay igo ra silang nagsunod kon unsa ang gisulat sa Balaang Biblia. Si Caño nga nahimong artistic director sa maong kalihukan sulod na sa lima ka tuig, naglaum nga sa sunod tuig, ang lokal nga kagamhanan sa Minglanilla mopalambo og laing lugar aron maka-akomodar sa mas daghang tumatan-aw sanglit bisan og adunay daghang ipahigayong sugat, mas sikat man gyud ang sa Minglanilla.

Ang municipal administrator nga si Concordio Mejias mibutyag nga ang lungsod migahin og P5.3 milyones alang sa mga kalihukan sa Sugat-Kabanhawan nga naglakip sa street dancing parade ug ritual showdown.

Ang kapolisan sa maong lungsod pinaagi ni Police Major Verñino Noserale mitataw nga mga 18 mil ka tawo ang misaksi sa maong kalihukan kagahapon. (Odessa O. Leyson/DILT)

Security plan sa Fiesta Señor himuon sab sa National Youth Day

Ang mga mosalmot sa National Youth Day 2019 gidid-an sa pagdala og backpack sulod sa Basilica Minore del Santo Niño de Cebu human sa himuong foot procession sama sa gipatuman niadtong nahitabong novena-mass alang sa kapistahan ni Senor Santo Nino.

Ang hepe sa Cebu City Police Office-Operations Branch nga si Police Major Wilbert Parilla miingon nga ang ilang gibuhat nga security plan atol sa novena mass sa Santo Niño mao sab ang gamiton sa ilang security preparation alang sa NYD.

Giingong ang mga deboto ra ang gidid-an nga magdala og backpack sanglit ang mga pilgrim aduna man silay uniformed nga mga bag nga dalhon. Matud ni Parilla kini ilang ipatuman sanglit wala silay nadawat nga hulga sa maong kalihukan sa pagkakaron.

Pilgrims ang tawag sa mga nagparehistro sa NYD nga gikan pa sa lagyong mga lugar sa Pilipinas.

Gibana-bana nga moabot ngadto sa 12 ka libo ka mga batan-ong pilgrim ang nagprehistro sa maong kalihukan nga magsugod karong Abril 23 ug matapos inig 28.

Ang NYD 2019 gi-organisa sa Catholic Bishop’s Conference of the Philippines pinaagi sa Episcopal Commission on Youth.

Una kini nga higayon nga mo-host ang Sugbo maong gipamgandaman karon sa mga otoridad ang seguridad niini.  (/DILT)(BANATNEWS)