Jonas Bueno nadakpan

CEBU, Philippines – Nadakpan na didto sa Davao City kagahapong adlawa  ang usa sa tulo ka mga suspek pagpatay didto sa Danao City niadtong Enero 11 ning tuiga nga gikonsiderar usab nga 'person of interest' sa pagpatay kang Christine  Silawan sa Lapu-Lapu City.

Sumala pa sa report sa DxAB sa Davao City,  ang mga sakop sa National Bureau of Investigation-11 ug Regional Intelligence Unit-11 ug Criminal Investigation and Detection Group-11 ang nakadakop kang Jonas Bueno. Si Bueno gipangita dinhi sa Sugbo tungod sa pagpatay sa 60-anyos nga mag-uuma didto sa bukirang bahin sa Danao City.  Napatay ang duha ka igsuon ni Bueno nga silang Jovy ug Junry sa engkwentro tali sa mga polis nga nigukod kanila samtang si Jonas nakaikyas.

Apan alas 5 kagahapon sa hapon, nadakpan si Bueno  kinsa nagtrabaho isip construction worker sa usa ka construction site sa Matina, Pangi,  Davao City.

"Apat na araw palang siyang nagtatrabaho sa construction site,  Ibang pangalan ang kanyang ginamit, umamin naman siya na siya nga si Jonas Bueno," matud pa ni NBI 11 Assistant Regional Director Jonathan Balite sa report sa maong sibyaanan.

Apan dili kombinsido si Lourdes,  inahan ni Christine nga si Bueno ang mamumuno.  Ang hulagway ni Bueno nag-trending sa social media dihang gitumbok nga maoy nagpatay sa dalagita.

Si Silawan gikuyogan sa pangulo sa Public Attorney's Office Lawyer nga si Persida Acosta sa Lapu-Lapu City Police Office ug nakigkita  kang Senior Supt. Limuel Obon ang City Police Director. Si Obon miingon nga person of interest si Bueno apan duna silay laing gisundan nga primary suspect sa pagpatay ni Silawan. Ang pamahayag ni Obon gidasonan ni Police Regional Office 7 Regional Director Police Chief Supt. Debold Sinas nga si Bueno person of interest kay nalambigit kini sa laing krimen nga may pagkaparehas sa pagpatay kang Silawan. Ang inahan sa biktima nga si Lourdes gusto nga kadto gyung tinuod nga mamumuno ang madakpan sa dili pa malubong ang anak.

Si Bishop Oscar Jaime Florencio, kanhi Cebu auxiliary bishop ug karon pangulo sa Military Ordinariate of the Philippines mipasabot nga duna gyuy mga tawong madani sa mga binuhatan nga iya sa demonyo kay sila "adventurous" ug "appealing" kun sakop niini. Matud niya yawan-on nga binuhatan ang paagi pagsimba sa kulto. Giawhag niya ang katawhan nga dili magtuo-tuo sa mga kulto. (Rowena Capistrano ug May Miasco/IBM)(BANAT NEWS)