MCPO director magpakasal sa mass wedding
CEBU, Philippines — Ang direktor sa Mandaue City Police Office ug ang iyang asawa maoy usa sa 16 ka paresan nga kaslon sa ipahigayong mass wedding sa Police Regional Office-7 karong adlawa. Ipahigayon ang maong mass wedding sa Saint Ignatius de Loyola Chapel sa Camp Sergio Osmeña subay sa anibersaryo sa PRO-7. Pormal na nga mabendisyonan sa katolikong simbahan ang relasyon nila ni MCPO direktor Police Senior Supt. Julian Entoma ug iyang pares nga si Socorro Villaces-Entoma.
Tuyo ni Entoma nga sa chapel sa PRO-7 magpakasal sanglit bisan og gihatagan sila og tulo ka adlaw nga pahuway nunot sa ilang kasal, tutok gihapon kini sa iyang trabaho isip direktor sa Dakbayan sa Mandaue.
Gani, giingong wala nay reception sa ilang kasal sanglit aduna pa siyay daghang asikasohon sa iyang trabaho.
Ang pagka Aglipayan nga tinuohan ni Socorro ug ang pagka Romano Katoliko ni Julian mao ang nahimong babag nga makasal sila sa simbahan, hinungdan nga nagpakasal sila og huwes niadtong Disyembre 16, 1997.
Dul-an 30 ka tuig nilang panag-uban, nakabaton sila og lima ka mga anak.
Ang maong mass wedding dili lang alang sa mga polis gani adunay tulo ka paresan nga mga sibilyan.
Si PRO-7 director Debold Sinas nagkanayon nga ang maong kalihukan subay sa ika-28 nga Foundation Day sa ilang buhatan.
Bisita nila karong adlawa mao si Police Deputy Director General for Operations Archie Francisco Gamboa kinsa maoy usa sa mga mobarog nga maninoy sa mga kaslonon. (BANAT NEWS)
- Latest
