Giilang high-value target sa Consolacion sikop

CEBU, Philippines — Mokabat sa kapin P200 mil ang balor sa ilegal nga drugas ang nasakmit sa mga sakop sa Cebu City Police Office Station 10 (Punta Princesa Police) ug 11 (Mambaling Police) atol sa ilang gipahigayon nga buy-bust operation niadtong Lunes sa buntag sa may dalan Sabellano ug Sunshine Valley.

Nasikop sa may Sabellano St. Brgy. Quiot, Cebu City si Raymond Cabunada, 29-anyos,  taga Brgy. Tabunok, Dakabayan sa Talisay.

Nakuhaan kini og unom ka gamay’ng pakete, lima ka medium nga pakete sa gituohang shabu nga motimbang og 25 gramos ug mobalor og P170 mil.

Sa laing operasyon nadakpan si Randy Babiera, 34-anyos ug residente sa Sunshine Valley sa Brgy. Quiot.

Nakuhaan si Babiera og usa ka gamay nga pakete, 16 ka gagmay’ng pakete ug usa ka medium nga pakete sa gidudahang shabu nga motimbang og 6.02 gramo nga mobalor og P40,936 mil.

Sa Lungsod sa Consolacion, nasikop ang usa ka giilang high-value target dihang gihimo ang buy-bust operation sa mga sakop sa Philippine Drug Enforcement Agency-7 ug ang Consolacion Police Station sa may Brgy. Cansaga niadtong Lunes sa gabii.

Ang nadakpan naila nga si Jumilito Lampa, 50-anyos, taga Brgy. Tugbongan.

Nasakmit gikan kaniya ang duha ka putos sa ginadiling drugas nga motimbang og 125 gramos nga mobalor og P850 mil basi sa dangerous drug board value.

Matud ni Leia Albiar, tigpamaba sa PDEA-7 nga dul-an sa duha ka semana nilang gi-develop ang kaso human adunay mipahibawo sa binuhatan sa dinakpan.

Dugang niya nga dagko nga pusher ang baligyaan ni Lampa hinungdan nga padayon pa kining gisukit-sukit sa awtoridad.

Ang mga dinakpan kasamtangang gitanggong ug gikatakdang pasakaag kasong kalapasan sa Sec. 5 og Sec. 11 art. II of R.A 9165. Nichole Alexis A. Abas (BANAT NEWS)