Toneladang plastic water bottles nahipos

CEBU, Philippines — Moabot sa duha ka tonelada sa plastic bottles ang nakolekta sa Cebu City Environment and Natural Resources Office (CCENRO) atol sa Sinulog 2019.

Gihulagway sa pangulo sa CCENRO, Nida Cabrera nga daku og tabang ang maong mga plastic bottles sa himuon unya nila nga biofence diin ang usa ka biofence nga adunay gitas-on nga 10 meters moabot sa 840 ka plastic bottles ang gikinahanglan.

Ang mga business establishments padayon sab nga nanghatag og plastic bottles sa CCENRO.

Nunot niini, si Cabrera miingon nga nakadawat sila og order gikan sa Department of Environment and Natural Resources (DENR) nga limpyohan ang river system sa siyudad.

Gani gipaabot nga ilang ilusad ang proyekto nga river clean-up diin adunay gipadala nga schedules aron paglimpyo sa napulo ka river system sa Cebu City.

Gihulagway ni Cabrera nga daku gyud kining problema. Hinuon basi sa order ni DENR Secretary Roy Cimatu gipatutukan niini ang tulo ka sapa sa siyudad nga naglangkub sa Mahiga, Bulacao, ug Guadalupe river.

“Gisugdan na sad namo pag-develop ang biofence, giusab na namo karon, dunay mga boundaries na ug gi-cluster namo ang atong mga rivers,” asoy ni Cabrera.

Moabot sa 200 ka biofences ang gikinahanglan karon sa CCENRO basi sa cluster nga ilang gi-identify sa tanang river system.

Gipahibawo sab ni Cabrera nga giapil sad nila sa pag-profile kun sa usa ka cluster pila ka balay, aduna sab silay education team nga mosuroy aron pag-orient nga gidili ang paglabay og hugaw sa sapa. (BANAT NEWS)