Mock election naapektahan sa signal shutdown-Comelec

CEBU, Philippines —  Nagkaproblema sa pag-transmit og resulta ang gipahigayon nga mock elections sa Commission on Elections (COMELEC) kagahapon tungod sa signal shutdown nga kabahin sa seguridad sa Pista sa Senyor Sto. Niño dinhi sa Sugbo.

“Because of the Sinulog nga naay signal jam or shutdown, naapektuhan gyud ang atong signal sa BGAN,” matud ni Provincial Election Supervisor Jerome Brilliantes.

Tulo ka oras nga gisuwayan sa COMELEC nga makapadala og resulta ang Broadband Global Area Network (BGAN) ayha pa kini naka-transmit.

Ang BGAN usa ka satellite-based technology nga giisip nga back-up plan kun magkaproblema ang signal gikan sa mga cell sites ug sa digital subscriber lines (DSL).

Si Brilliantes nagkanayon nga nagtuo sila sa Provincial Board of Canvassers (PBOC) nga mogana ang BGAN bisan pa man walay signal.

“That’s what we were thinking of nga independent siya, that we can get signal from the satellite but what happened now is the otherwise around,” sigon niya.

Ang dry-run sa piniliay gihimo kagahapon sugod sa alas 6 sa buntag ngadto sa alas 12 sa udto. Ang lungsod sa Santander ug Dakbayan sa Sugbo ang napilian nga testing sites.

Ang mga boto nga naihap sa Vote Counting Machines (VCM) wireless nga i-transmit gikan sa mga presinto ngadto sa City or Municipal Board of canvassers ngadto sa PBOC. Ang madawat sa PBOC maoy i-forward ngadto sa kauluhan.

Apan lapas na sa alas 2 sa hapon, wala pay nadawat ang PBOC.

“Both ends. Di ta maka-receive sa Santander [and] di pud ta kalabay didto sa Manila,” si Brilliantes miingon.

Alang kang Brillantes, maayo gihapon kini tungod kay sayo palang nadiskubrehan na nila ang problema ug ilaha kining pangitaan daan og solusyon  aron dili mahitabo sa adlaw na sa piniliay karong Mayo.

“Although naay mga glitches gamay nga atong nakita, thankful pud mi ana kay makatabang na siya sa atong election day. Atong ma-recommend nga what can we do if ever we meet such thing like this during election day,” tataw niya.

Human sa troubleshooting, naka-transmit na ang COMELEC pagka-2:50 sa hapon gamit ang BGAN. Gawas sa pagkalangay gihulagway niyang malampuson ang mock elections. – IBM, (BANATNEWS)