“Manag-uyab” patay sa motel

CEBU, Philippines – Napalgang patay ug adunay samad pinusilan sa ilang mga ulo ang 65 anyos nga lalaki ug ang 22 anyos nga babaye sulod sa usa ka motel sa may dalan Manalili, sa Barangay Sto. Niño, Dakbayan sa Sugbo niadtong Lunes sa gabii.

Ang lalaki nailhan nga si Ely Dela Cruz Malagum, residente sa Dakbayan sa Talisay nga giingong adunay kapuyo kaniadto apan nagkabuwag na.

Samtang ang batan-ong babaye giila nga si Danica Rose Erolya, taga Barangay Suba San Nicholas, Dakbayan sa Sugbo.

Base sa report sa kapolisan, napalgan ang duha dihang pugsanong giablihan sa room boy, bell boy ug sa gwardiya sa maong motel ang pultahan sa lawak nga giestaran sa duha kay walay mitubag sa ilang pagsampit.

Niadto rang Enero 5 naka-check -in ang duha ug ni-extend kini ngadto sa petsa syete. Gikatakda na untang mo-check out ang duha Lunes sa gabii apan bisan giunsa og tuktok sa mga tagdumala sa maong motel, walay manubag.

Napalgang naghigda sa kama ang duha ug nagkuptanay pa sa ilang mga kamot.  Nagkulob na si Erolya ug adunay samad pinusilan sa iyang wala nga tampihak, samtang si Malagum naghayang ug naghupot og usa ka 45.caliber Glock pistol. Adunay samad pinusilan sa iyang tuo nga tampihak si Malagum. Ang hepe sa Waterfront Police Station nga si Senior Inspector Joemar Pomarejos miingon nga sayo pa para mohatag og espekulasyong gipusil patay ni Malagum si Erolya una siya nagpakamatay.

Gipaubos na og paraffin test ang kamot sa patay nga si Malagum aron masuta kun nakapabuto ba kini sa maong armas.

Usa ka cross matching exam sab ang himuon aron masuta nga ang armas nga anaa sa kamot ni Malagum tukma sa bala nga nakapatay sa duha.

“Speculations ra na as of this time. Without the result of the crime lab, di pa ta makaingon,” si Pomarejos miingon sa Banat News.

Dugang butyag ni Pomarejos nga walay staff sa maong hotel ang nakamatikod sa boto gikan sa lawak sa mga biktima nunot sa kabaga sa kongkretong bongbong.

 Gibana-bana sa mga otoridad nga di palang dugay namatay ang duha sa dihang napalgan sila.

“Estimated nga six hours before the time of discovery (sila namatay),” dugang sa maong hepe.

Niining pagsuwat, wala pay matumbok nga motibo ingon man anggulo sa maong krimen ang kapolisan samtang wala pa migawas ang resulta sa mga eksaminasyon.

Ang maguwang ni Erolya nga si Mercy Labrador mikompirmar nga dunay relasyon ang duha sud na sa upat ka tuig. Si Erolya adunay usa ka anak. (Nichole Alexis Abas/IBM)(BANAT NEWS)