Pantawid Pasada Cards pwede ipakuha sa lain
CEBU, Philippines — Mahimo na nga kuhaon ang Pantawid Pasada Cards sa usa ka representante apan aduna kini Special Power of Attorney nga dala nga gikan sa tag-iya sa prangkisa sa pangpublikong sakyanan.
Kini alang niadtong adunay mga kakulian ug sakit, mga wala nakapabalhin sa pangan ug kadtong dili gyud makakuha personal, sumala pa ni Eduardo Montealto, ang regional director sa Land Transportation Franchising and Regulatory Board 7.
Giusab sa LTFRB ang ilang lagda sugod kagahapon dihang ilang nakita nga gamay ra ang nanguha sa Pantawid Pasada Cards gumikan kay naglatid kini nga ang operators ra gyud sa jeepney ang makakuha niini.
Ang maong card adunay sulod nga P5,000 isip ayuda sa mga jeepney drivers ug kini alang lang gyud sa patubil og gasolina o diesel sa unit.
Matud ni Montealto nga naa sa card ang plate number sa unit nga tubilan og dili kini pwede gamiton sa laing sakyanan.
"Kay violation na man na. Unya og masakpan sila kay pwede sila ma-blacklist ug dili na pwede makadawat og dugang nga ayuda sunod tuig," matud ni Montealto. Sunod tuig ang maong card sudlan na kini og P20,000 matag unit.
Dugang ni Montealto nga 43 porsyento pa lang sa 5,324 fuel cards alang sa first batch ang nahatag na sa mga jeepney operators sa Sugbo ug aduna pay 6,000 ka fuel cards ang moabot isip second batch alang sa mga jeepney operators sa Central Visayas. -/GMR (BANATNEWS)
- Latest
