Karaang bilangguan sa TCPS ugmaron

CEBU, Philippines – Ipaugmad sa kapolisan sa Siyudad sa Talisay ang karaang bilangguan nga naa sa ilang buhatan sa Barangay Poblacion sugod kagahapon.

Kini human nila nakita nga risgo sa ilang trabaho ang walay kabutangan sa mga dinakpan tungod kay puno na ang ilang detention cell nga naa nahimutang sa ubos nga bahin sa city hall building.

Si Chief Inspector Ardeolito Cabagnot, deputy chief sa Talisay City Police Station nagkanayon nga nisugwak na ang gidaghanon sa mga binilanggo sa siyudad gumikan sa ilang subsob nga operasyon ilabi na sa ilegal nga drugas.

Matud ni Cabagnot nga kong aduna silay laing madakpan mapundo pa diha sa ilang buhatan tungod kay walay kabutangan niini ug risgo kaayo kini sa ilang bahin.

Ang kapolisan sa siyudad nihangyo sa kagamhanan sa siyudad nga matabangan sila sa mao nilang problema ug gisusi na ang karaang bilangguan aron masuta ang mga gikinahanglan sa pagpaayo niini.

Si Cabagnot nanghinaot nga matagad dayon ang ilang hangyo ug madali ang pag-ugman sa maong bilangguan aron magamit usab dayon kini. (/BDB)(BANAT NEWS)