Mananagat, laing usa gipamusil

CEBU, Philippines — Patay ang 53-anyos nga mananagat human gipusil sa wala pa hiilhing mamumuno sa Barangay Hemensolan, Lungsod sa San Francisco, Isla sa Camotes alas 6 pasado sa niaging gabii sa adlaw sa mga kalag.

Ang biktima giila sa kapolisan nga si Romulo Nodalo Barrientos nga nagpuyo sa maong dapit kinsa naglakaw lang pauli sa ilang panimalay dihang kalit lang gipusil nga nakaingon sa hinanaling kamatayon niini.

Sa crime scene napalgan sa kapolisan ang mga kabhang sa bala sa .9mm nga armas nga gituohan sa kapolisan nga gikan sa armas sa wala hiilhing mamumuno nga gigamit sa pagpusil patay sa biktima.

Samtang patay sab sa Adlaw sa mga Santos sa Sitio Soong 1, Barangay Mactan, Dakbayan sa Lapu-Lapu ang usa ka tawo nga gipusil sa riding-in-tandem.

Si Senior Police Officer 1 Louisito Ernie sa Homicide Section sa Lapu-Lapu City Police Office (LLCPO) niila sa biktima nga si Begie Bohanghang, 35-anyos, nga nagpuyo sa Barangay Cabancalan, Dakbayan sa Mandaue.

Matud ni Ernie nga nagbarug lang daplin sa karsada ang biktima alang sa pagpaabot sa kasakyan nga taxi sa iyang pagpauli sa ilang panimalay sa Dakbayan sa Mandaue dihang kalit lang nitumaw ang motorsiklo nga giluwanan sa duha ka wala hiilhing lalaki.

Ang backride maoy nagpusil sa biktima sa makadaghang higayon nga nakaingon sa mga samad pinusilan sa iyang kalawasan nga nakaingon sab sa iyang hinanaling kamatayon.

Hinoon si Ernie niingon nga dihang ilang gisubay ang pagkatawo sa biktima ilang nasuta nga usa kini ka drug personality ug aduna kini pending nga mga kaso sa kapolisan sa Dakbayan sa Sugbo. (/GMR)(BANATNEWS)