Budget sa public safety gipatas-an
CEBU, Philippines — Giduso sa executive department sa kagamhanan sa Siyudad sa Sugbo ang P164.9 million alang sa peace and order program ug public safety plan alang sa sunod tuig.
Mas dako kini kon itandi sa budget karong tuiga nga moabot og P138.9 million alang sa maong mga programa bisan og dili nindot ang relasyon ni Mayor Tomas Osmeña ug sa mga opisyal sa kapolisan.
Dunay P65 million ang gigahin alang sa incentive allowance sa mga polis nga nagserbisyo sa siyudad ug laing P2.5 million allowance alang sa mga police nga nadestino sa bukirang barangay.
Lahi sab ang giduso nga P2.5 million alang sa training expenses sa kapolisan ug laing P1 million alang sa ammunitions sa mga sakop sa militar ug sa polis.
Ang giduso nga P164.9 million apil sa gi-propose nga P8.1 billion annual budget alang sa sunod tuig nga operasyon sa dakbayan diin himoon ang deliberation niini sa konseho karong adlawng Martes.
Ubos sa Annual Investment Plan sa peace and order program, nalakip niini nga ang P22.9 million mao ang pagpalit og motor vehicle apan wala kini gahini sa executive department. Kini usab ang nahitabo sa P5 million alang unta sa police equipment.
Laing giduso sa executive department ang budget sa peace and order program ang; P8.6 million allowance sa firemen nga nagserbisyo sa siyudad, P15 million honoraria alang sa Barangay Peacekeeping Action Team, ug P1 million sa Cebu City’s Oplan Pakigsandurot.
Alang sa anti-drug campaign program, ang executive department miduso sab og P1.5 million alang re-orientation sa Barangay Anti-Drug Abuse Council sa 80 ka barangay, P2 million alang sa drug awareness activities, P100,000 sa drug testing kits, P4.4 million sa laboratory confimatory testing ug P1 million alang sa livelihood program sa drug surrenderers. (/DILT)(BANATNEWS)
- Latest
