Pamakuna nahunong, mga ginikanan nahadlok

CEBU, Philippines – Ubay-ubay nga bakuna alang sa mga tinun-an sa elementarya sa Lalawigan sa Sugbo ang wala magamit ug anaa ra nakapundo sa mga Rural Health Units (RHU) sa kalungsuran.

Kini gumikan kay pipila sa mga ginikanan ang wala mosugot nga pabakunahan ang ilang mga anak human sa kontrobersiya sa “Dengvaxia” vaccine sa Department of Health (DOH).

“Ang mga inahan wala tugti nga magpa-vaccine ang ilang mga anak,” matud sa pangulo sa Provincial Health           Office (PHO), Dr. Rene Catan.

Siya nagkanayon nga apektado ang ubang matang sa bakuna tungod kay nahadlok na ang mga ginikanan tungod sa Dengvaxia.

Matag buwan sa Hulyo ang PHO moapod-apod kini sa mga bakuna gikan sa DOH ngadto sa mga tunghaan alang sa himoon nga school-based immunization matag buwan sa Agosto.

Ang mga bakuna nga kasagaran wala magamit mao ang alang sa measles o tipdas, Tetanus–Diphtheria (TD) ug Human Papillomavirus (HPV).

Base sa datus sa cold storage facility sa PHO, 14,873 ka vials ang alang sa measles o tipdas diin ang usa ka vial alang kini sa lima ka tinun-an; 9, 864 usab ka vials ang alang sa Tetanus–Diphtheria (TD) nga matag usa ka vial alang sa 10 ka estudyante; ug 18, 440 usab ka vials alang sa HPV.

Apan sumala sa PHO nga halos katunga sa maong mga bakuna ang wala magamit tungod kay ang pipila ka ginikanan nahadlok nga masusama ang ilang mga anak sa mga naturokan og Dengvaxia nga giingong nasakit ug gani aduna pay gikataho nga          namatay.

Si Gobernador Hilario Davide III nagkanayon nga hagit kini karon sa health department ilabi na nga aduna nay kabalaka ang mga ginikanan apan kinahanglan nga ang PHO mohimo og information drive sa mga eskwelahan aron pagpasabot sa mga tinun-an nga luwas ang mga bakuna sa DOH.

Si Catan nipasabot nga importante nga magpadayon ang pamakuna  aron nga malikay sa mga sakit nga mapugngan unta sa maong mga matang sa bakuna.

Ang PHO nilugway sa panahon sa ilang pagpamakuna ngadto sa mga eskwelahan aron nga mas daghan pa gihapon ang mga tinun-an ang maturokan. (/GMR)(BANAT NEWS)