Mayor Chiong ug MGB-7 nagkasumpaki

CEBU, Philippines — Nagkasumpaki karon ang pamahayag ni City of Naga Mayor Kristine Vanessa Chiong sa giluwatang pamahayag sa Mines and Geosciences Bureau- 7  bahin sa pagdahili sa yuta nga nitabon sa mga kabalayan ug nipatay sa mga molupyo sa duha ka sitio sa  Tinaan sa maong siyudad sa miaging semana.

Matud sa mayor sa mga tigbalita hangtod karon wala pa siyay nadawat sa official report bahin sa mga liki sa yuta ibabaw nga bahin sa  Tinaan sa gihimo nilang inspeksyon ug imbestigasyon kauban sa mga sakop sa City Community Environment and Natural Resources Office (CENRO).

Ang Sitio Tagaytay 2 ug Sindulan sa maong barangay maoy natabunan sa yuta duha ka adlaw human sa giingong inspeksyon.

Ang MGB-7 sa ilang post sa ilang website nag-ingon nga Septiyembre 12, 2018 – mipadala sila og Geohazard Threat Advisory sa buhatan sa mayor sa Naga.

Sa pagsumpay-sumpay sa gihimo sa MGB-7, sila nangangkon nga niadto pang Agosto 28, 2008  nagpahigayon sila og Geohazard Mapping sa barangay Tinaan apil na ang Sitio Sindulan.

Matud pa nga mirekomendar ang MGB-7 kaniadto nga pabalhinon ang 26 ka pamilya kay nagpuyo sila sa tiilan sa aktibong landslide area sa Sitio Sindulan. Samtang sa Sitio Taylor Ville, adunay mga pamilya nga girekomendar sab nila nga ibalhin kay naa sila sa bakilid.

Giingong adunay kopya ang barangay sa MGB Field Data Sheet  nga gidawat ug napirmahan kaniadto ni barangay kagawad Dionisio Basalo niadtong Agosto 28, 2008.

Niadto usab Septiyembre  ning tuiga atol sa pagsulod sa bagyong Ompong mirekomendar sila pag-usab nga pabalhinon ang mga residente kay risgo kaayo ang dapit human sa inspeksyon duha ka adlaw sa wala pa ang bagyo.

Matud pa nga kabahin sa maong advisory nag-ingon: “Heavy rains and strong winds brought about by typhoon Ompong may intensify the southwest monsoon (Habagat) which may bring occassional moderate to heavy rains over Central Visayas by Wednesday and Thursday, and windy to light to moderate rains from Friday to Saturday. This could trigger flashfloods in low-lying areas along river systems or landslides along mountain slopes.... Results of the geohazard mapping and assessment within your area of jurisdiction provided you with important information findings and recommendations that would enhance your efforts at reducing the possible effects of impacts of Typhoon Ompong.”

Matud pa sa MGB-7 nga giawhag nila ang mayor pinaagi sa maong advisory paghimo na og mga lakang ang lungsod aron ihiklin sa mas luwas nga lugar ang mga residente ilabi na  kadtong nagpuyo duol sa mga bungtod, sapa, bakilid ug baybayon.

Apan si Chiong nipadayag nga kung nakita na sa MGB-7 ang risgo sa lugar niadto pang tuig 2008 nganong niluwat pa sila og Mineral Production Sharing Agreement ug nihatag og environmental compliance certificate sa pagpahigayon og quarry sa maong lugar.

Matud sa mayor dili karon panahon sa pagbinasulay apan ang mga dokumento nga iyang gihuptan nagpakita sa kamatuoran.

Sumala pa sa mayor wala pa hangtud karon gihatag kaniya ang resulta sa imbestigasyon nga gihimo sa MGB-7 duha ka adlaw sa wala pa ang landslide.

Gipadayag sa mayor sa pagkakaron maoy iyang gitutukan ang nagpadayon nga search and rescue operation ug pag-ugkat sa mga lawas ug ang pagpahiluna sa mga nakalas ug pagtabang sa ilang pamilya. (BANAT NEWS)