Namadlong sa sabaan gipamusil

CEBU, Philippines – Nabuslot ang tiyan sa delivery boy sa softdrinks ug naigo sa tiil ang lain niining kauban dihang kalit lang gipamusil sa duha ka hubog nga silingan sa Sitio Ubos, Barangay Poblacion, Lungsod sa Cordova alas 12 pasado sa niaging tungang gabii.

Si Police Officer 3 Vilma Degamo sa Cordova Police Station niila sa mga biktima nga sila si Tata dela Torre, hingkod, ug trabahante sa negosyante og softdrinks sa maong dapit nga si Pamela Calimbas.

Giila ni Degamo ang laing naangol nga si Julius Mar Andales nga nagpuyo sa maong dapit.

Ang mga suspek mao sila si Rizaldo Baloro, lumad nga taga Bohol ug temporaryo nga nagpuyo sa maong dapit, ug si Onog Premacio, hingkod, nagpuyo sab sa maong dapit, kinsa pulos nakasibat ug padayon karon nga gipangita sa kapolisan.

Matud ni Degamo nga unang gikalalis sa duha ka suspek ang lain nilang silingan nga si Warly Cañete kinsa nibiya sa maong dapit dihang nakamatikod nga nagkainit na ang ilang panaglalis.

Samtang nahabilin ang duha, nakamugna kini og kasaba sa maong dapit nga nakatugaw sa nangatulog na nga mga molupyo.

Gibadlong kini ni Dela Torre kauban ni Andales apan kalit lang silang gipamusil sa mga suspek.

Ang mga biktima dali nga gidala sa tambalanan. (/GMR)(BANAT NEWS)