BOC nipahimangno batok ‘love scam’
CEBU, Philippines – Giawhag sa Bureau of Customs ang kababayen-an nga dili magpadala sa modus sa internet love scam gikan sa giingong pipila ka nagpaila nga mga langyaw.
Kini ang gitug-an ni Erwin Andaya, administrative officer sa BOC-Cebu.
Matud ni Andaya nga adunay duha matag adlaw nga ilang madawat nga reklamo gikan sa kababayen-an, walk-in man o tawag sa telepono, nga nakapadala sila og igong kantidad sa kwarta kay aduna silay madawat nga package gikan sa giingon nilang boyfriend nga langyaw.
Dugang ni Andaya nga aron pagseguro nga dili scam ug dili masayang ang kwarta, sa higayon nga adunay madawat nga package kinahanglan segurohon kini sa buhatan sa BOC o kaha inig abot sa giingong padala nga regalo ug dili mobayad diha sa mga bangko o money remittance kay segurado gyud nga walay moabot nga package.
Awhag ni Andaya sa katawhan ilabi na sa mga babaye nga dili magpadala sa ilang uyab nga langyaw ilabi na kung mangayo na og kwarta bugti sa package nga ipadala. (/GMR)(BANAT NEWS)
- Latest
