Namato napusilan patay

CEBU, Philippines — Napusilan patay ang usa ka 43- anyos nga lalaki kinsa giingong kalit lang nga namato ug nakaigo ug nakaangol og polis diha sa dalan Escario, Barangay Capitol Site, Dakbayan sa Sugbo kagahapon sa hapon.

Ang hepe sa Cebu City Police Station 2 nga si Chief Inspector Maria Theresa Macatangay nagkanayon nga ala  1:45 sa hapon miresponde ang ilang polis nga si Police Officer 1 Berlino Ricafort sa sumbong nga adunay  tawong naghuramentado ug namato sa maong lugar.

Suway nga gipakalma ni Ricafort ang suspetsado nga giila nga si Susanito Ellama, taga Morcillas, Tubungan, Iloilo City apan giapil pa siya niini og buno bisan pa man og nagpaila na siya nga polis.

Nakahiagom og tulo ka mga igo sa iyang ulo ang maong polis hinungdan nga iya kining gipusil aron nga maundang apan giingong misamot pa hinuon kini paghamag kaniya maong giusban kini pagpusil ug naigo sa tiyan.

Nalipong ug naluya na ang maong polis maayo na lang nga gitabangan siya sa pipila ka mga sibilyan sa maong dapit.

Usa na niini ang usa ka Angkas driver diin gibunalan niya ang suspetsado sa iyang helmet aron lang nga moundang kini.

Gikan sa usa ka cellphone video sa sibilyan sa maong dapit, nakita nga samtang nagposas si Ricafort sa suspetsado, gipugngan sa Angkas driver ang nagpusot-pusot nga dugo sa ulo sa polis.

Dali nga gidala sa tambalanan ang duha apan wala na nakaabot nga buhi si Ellama.

Butyag ni Macatangay nga karong adlawa lang naabot sa Sugbo ang maong suspek, gani gipadala sa taga Cebu Port Authority (CPA) si Ellama ngadto sa tambalanan human nakamatikod sila nga di magkadimao ang sinuwatan niini.

“He was first intervened by the CPA and gi-secure padung CCMC kay dili kuno normal ang agi, pero pag-check wala may deperensya mao gi-release ra sad, mao wala ta confirmation if buang ba gyud,” si Macatangay miingon. Dugang niini nga nagpasumangil sa mga otoridad si Ellama nga motambong sa event sa iyang anak diri.

Niining pagsuwat, wala pa matumbok sa kapolisan kon unsa gyud ang hinungdan sa pagpamato ni Ellama ug kinsa ang iyang tuyo dinhi sa siyudad. (BANAT NEWS)