Baho sa CCJ gireklamo sa mga residente sa palibot

CEBU, Philippines — Nagpakitabang sa kagamhanan sa Dakbayan sa Sugbo ang warden sa Cebu City Jail tungod sa ubay-ubay nga reklamo gikan sa mga silinganan niini mahitungod sa baho nga wastewater nga maabot diha sa ilang sapa.

Si Superintendent Renante Rubio, warden sa Cebu City Jail male dormitory nipadangat og suwat ngadto sa kagamhanan sa siyudad aron matabangan sila sa mao nilang problema.  Pipila ka mga residente nga nagpuyo duol sa CCJ nipadangat sa ilang reklamo tungod sa nangalisbo nga baho gikan sa maong prisohan.

Si Konsehal Dave Tumulak, chairman sa committee on peace and order sa konseho sa siyudad nipasalig nga mohatag sila og tabang.

Matud ni Tumulak nga ang gidaghanon sa piniriso nga sobra sa kapasidad sa maong bilanggoan maoy usa sa mga hinungdan sa problema.

Kini tungod kay ang hugaw sa mga piniriso nga mapundo diha sa septic tank dili maato og habwa.

Nanawagan si Tumulak ngadto sa mga piniriso nga dili magpatuyang og gamit sa pansayan tungod kay namatikdan nga dunay mga sinina nga gihulog diha sa iniduro nga maoy hinungdan sa pagkabara niini. Nipasalig si Tumulak nga siya na ang mopahibalo ngadto sa City Health Department aron masusi sa mga sanitary inspector ang CCJ diin sila ang mohatag  og rekomendasyon nga masulbad ang problema.

Si Tumulak nihangyo usab nga bantayan una sa city jail ang ilang waste treatment facilities paglikay nga modako ang problema samtang wala pa kin masusi sa CHD. (/BDB)(BANATNEWS)