National ID gihangop sa kapolisan
CEBU, Philippines — Gihangop sa kadagkuan sa kapolisan sa Rehiyon 7 ang planong National Identification System sanglit gawas nga makatabang kini sa imbestigasyon sa krimen, giingong adunay plano ang ilang mga labaw nga i-connect kini sa ilang planong National Police Clearance.
Ang tigpamaba sa Police Regional Office-7, Supt. Reyman Tolentin, nagkanayon nga daku og matabang sa pag-ila sa mga suspek sa krimen ang National ID System.
Gawas sa personal nga detalye sama sa pangalan, edad ug pinuy-anan, ang National ID adunay biometrics diin napatik ang nawong, mga fingerprints ug ang iris scan niini.
Dugang niya nga kun matuman na sab ang National Police Clearance, dali na lang sab ang pagsubay kun aduna bay pending nga kaso ang usa ka tawo.
"Kung i-link nato ang ID System sa National Police Clearance, dali na lang ang pag-determine if naa ba kay kaso. Bisag naa pa kay kaso nya moari ka og Cebu City magkuha ka og police clearance, pag-check ana dali na lang mahibaw-an if naa kay kaso didto.
It’s very favorable to the law enforcement, ang National ID," matud ni Tolentin.
Taliwa sa maong kalambuan, wala sab gisalikway sa kapolisan ang posibilidad nga maabuso ang bag-ong sistema.
Nahimo na nga balaud ang National ID System human kini pirmahi ni Presidente Rodrigo Duterte niadtong Agosto 6. (BANAT NEWS)
- Latest
