MSWDO sa Kapitolyo ikiha ni Magpale

CEBU, Philippines – Nagplano ang Provincial Women's Commission nga mopasaka og kaso batok sa Municipal Social Welfare and Development Officer sa Lungsod sa Daanbantayan nga si Heide Aplece.

Kini human giingong nang-indurso og mga tinun-an nga dili kwalipikado sa Paglaum Scholarship Program sa Kapitolyo.

Si Bise Gobernador Agnes Magpale, pangulo sa PWC, nitug-an nga nakadawat siya og tawag nga nagpahibalo nga ang amahan sa usa ka scholar tag-iya og Van-for-Hire (V-Hire) nga nagpasabot nga dunay ikapaeskwela sa anak.

Ang rekomendasyon gikan sa social worker ang usa sa mga rekisitos nga dad-on sa mga bata dihang isalang sila sa interview uban sa mga opisyal sa Kapitolyo diin mangunay pa og interview si Magpale.

Susihon karon sa PWC kun pila sa mga napasulod nga scholars ang dili kabus. Si kanhi mayor Malou Loot nga consultant ug tigpamaba sa MSWDO sa Daanbantayan nidepensa kang Aplece ug nagkanayon nga pamolitika lang ang gihimo sa kampo sa bise gobernador.

Matud ni Loot nga ang mga konsehal sa lungsod nga kaalyado nila ni Magpale ang mismo ni-endorso ngadto sa social worker.

"Rekomendasyon man tawon na ilang mga konsehal kay wala man tawon na kalibutan ang MSWDO kinsa nang mga tawhana oy, dili man sad sila ang nag-conduct og investigation kun pobre o datu ba," matud ni Loot.

Matud ni Loot nga dili mahimo nga mahilabtan sa Kapitolyo ang MSWDO sa Daanbantayan tungod kay dili kini ilang hurisdiksiyon.

Si Magpale nagkanayon nga napahibalo na si Aplece kalabot sa maong isyu ug siya pasakaan og falsification of document, kasong kriminal ug administratiba.

Si Magpale nipadangat og kasubo tungod kay matud pa daghan pa unta nga mas nanginahanglan sa scholarship ang masulod kung wala sila giilad sa maong social worker.

"She made fun of our scholarship program," matud ni Magpale.

Gawas sa free tuition sa mga scholars, makadawat sab og tag P1,500 nga allowance ang mga scholars sa Paglaum Scholarship Program sa Kapitolyo. (/GMR)(BANAT NEWS)