22 ka paresan sa magtiayon subling nanumpa

CEBU, Philippines – Subling nanumpa sa panaad sa ilang kaminyoon ang 22 ka paresan sa magtiayon gikan sa nagkadaiyang parokya sa Archdiocese of Cebu pinaagi sa pagtambong sa usa ka Santos nga Misa nga gitagana alang sa kalikupan nga gipangulohan sa Cebu Archdiocesan Commission on Environmental Concern sa Cebu Archdiocesan Shrine of Sacred Heart of Jesus.

Kini gidumala nila ni Archbishop Osvaldo Padilla kanhi Apostolic Nuncio sa Korea ug Mongolia ug Rev. Monsignor Daniel Sanico, Episcopal Vicar of Cebu.

Human sa Santos nga Misa alang sa pagbag-o sa panaad sa 22 ka magtiayon gisunod ang pagpananom nila og kahoy nga gitawag og Eterni-Tree isip simbolo sa ilang commitment sa kinaiyahan sulod sa Archbishop Compound.

Matud pa ni Padre Murphy Sarsonas, pangulo sa CACEC ikaduha kini nila karon ka tuig pagpahigayon sa renewal ug marriage vows sa magtiayon lakip ang pagpananom ug tanom nga ilang alimahon sama sa pag-amping nila sa ilang kaminyoon.

Sa nilabay nga tuig, adunay napulo ka magtiayon ang unang niapil sa maong kalihukan ug tanan usab nga native trees ang padayon karon nga buhi tungod kay padayon kini nilang giatiman.

Si Sarsonas nagkanayon nga ang environmental advocacy nagsugod gayud sa panimalay hinungdan ang magtiayon dako kaayo og papel alang sa paggiya sa ilang kabataan alang sa environmental conservation and protection. (/BDB)(BANAT NEWS)