Cyber pornography alarming na

CEBU, Philippines – Giangkon sa Provincial Women’s Commission (PWC) nga nagpabilin gihapon ang problema sa cyberpornography sa Lalawigan sa Sugbo.

Subay kini sa tulo ka mga bata nga naluwas sa Lungsod sa Cordova ug Dakbayan sa Talisay karong buwana.

Si Bise Gobernador Agnes Magpale, ang chairman sa PWC nagkanayon nga sa ilang nakuha nga taho, ang mga biktima nga mga bata sa cyber pornography kaniadto mao nay mamiktima karon.

“Dunay report nga ang perpetrator karon mismo, was once upon a time a victim” matod ni Magpale kinsa midugang nga alarming na ang maong nagpadayon nga malaw-ay nga binuhatan aron lang makakwarta.

Ang duha ka babaye nga nag-edad og 6-anyos ug 11-anyos na-rescue didto sa balay sa suspetsado sa usa sa mga barangay sa Lungsod sa Cordova samtang ang 9-anyos ang naluwas sa Talisay atol sa follow-up operation sa awtoridad.

Si Magpale nagkanayon nga dili pakyas ang ilang tinguha nga mawagtang ang cyberpornography sa lalawigan apan iyang gipasalig nga magpadayon ang ilang kawsa pagpakgang sa maong bati nga binuhatan.

Matod sa bise gobernaodor nga ang nalambigit sa cyberpornography aduna nay na-establisar nga kliyente nga ilang gitawag og “sponsors”. Gani adunay bag-ong pamaagi karon kon diin ipakita lang ang dughan sa biktima, aduna na dayon silay makuha nga 10 dollars gikan sa ilang mga contact.

Si Magpale nagkanayon nga padayon gihapon ang ilang operasyon pagbatok sa mga nagbuhat niini apan niangkon nga kutob ra usab sila sa tip gikan sa mga informant o sa mga silingan sanglit walay ekipo nga makasubay sa “conversation” sa mga mohimo og cyberpornography dili sama didto sa gawas sa nasud.

“Padayon gihapon, continue lang gyud og raids” matod ni Magpale kinsa midugang nga padayon usab ang ilang koordinasyon sa Philippine National Police (PNP), National Bureau of Investigation (NBI), International Justice Mission (IJM) ug uban pang stakeholders. (/DILT)(BANAT NEWS)