Drug pusher napatay didto sa Bohol

CEBU, Philippines - Patay sab ang usa ka “level 6” high value target sa Central Visayas kay misukol og pinusilay sa kapolisan atol sa buy-bust operation didto sa Sierra Bullones cockpit arena sa Barangay Poblacion, lungsod sa Siera Bullones, Bohol niadtong Sabado sa gabii.

Ang napatay mao si James Reyes, residente sa lungsod sa Pilar, Bohol. Ang samaron nga si Reyes gidala unta sa ospital apan wala na matabang. Diha nga gihiling ang iyang lawas, dunay duha ka medium nga pakete sa shabu nga nakuha ang mga polis.

Ang kapolisan nakakaplag usab og usa ka shotgun ug siyam ka bala didto sa Toyota Fortuner nga gipanag-iya ni Reyes. May upat ka pakete nga shabu nga mitimbang og 30 gramos nga kantidad og P354 mil ang nasakmit sa mga polis.

Gipahigayon ang buy-bust didto sa buwangan apan matud pa nga nakamatikod kini nga polis ang iyang gikatransaksyon, hinungdan nga mihulbot kini sa iyang 45 kalibre nga pistola, apan dali kining nasirkulohan sa kapolisan.

Si Supt. Jonathan Cabal, hepe sa Regional Intelligence Division (RID), miingon nga si Reyes gipanid-an nila sulod na sa pipila ka buwan kay dili lang sa Bohol ang iyang pagpamaligya og drugas, kon dili, apil na sa ubang dapit sa rehiyon.

Matud ni Cabal nga nakakuha sila og inpormasyon nga si Reyes nagkuha og supply sa shabu gikan sa iyang kontak sa New Bilibid Prison sa Muntinlupa. Wala hinoon makakuha og kasayuran ang kapolisan kon si Reyes may kontak ba sa ubang rehiyon.

Gibutyag ni Cabal nga si Reyes maoy supplier og shabu ni Teofilo Tampus alyas Tamjun, 47, nga nakuhaan og tulo ka kilong shabu nga kantidad og P18 milyones kaniadtong Mayo 5, didto sa Barangay Nahawan, Clarin, Bohol. (BANAT NEWS)