Gibunalan og katala patay

CEBU, Philippines - Patay ang 48-anyos nga lalaki human bunali sa ulo gamit ang katala sulod sa iyang gipuy-an sa Rosal St., Brgy. Kamputhaw sa Dakbayan sa Sugbo pasado alas 8 niadtong nakalabay nga gabii. Giila ang biktima nga si Enrique Chiu, dunay kapuyo. Samtang ang gitumbok nga suspetsado mao si Hernani Alcobe, hingkod, suluguon sa biktima nga lumad nga taga Sagay City, Negros Occidental.

Sa imbestigasyon sa homicide section sa Cebu City Police Office nga gipangulohan ni SPO4 Ruth Violango, nasayran nga nadungog sa mga silingan ang singgit sa biktima nga nangayo og tabang. Dihang ilang gisubay, ilang nakita ang biktima nga naligo sa iyang dugo ug dunay dakong samad sa ulo. Samtang tapad niini ang usa ka katala nga nabulit sa dugo nga posibling gigamit sa suspek sa pagbunal.

Suway pang gidala sa pribadong tambalanan ang biktima apan nakabsan gayod kini sa iyang gininhawa.

Nasayran sa kapolisan nga posibling gihimo sa suspek ang krimen gumikan sa iyang kalagot dihang kini gikasab-an.

Hangtod karon nagpadayon ang pagpangita sa mga polis kang Alcobe kinsa daling misibat human sa hitabo. (BANAT NEWS)