Pagwagtang sa honorarium makaapekto sa serbisyo
CEBU, Philippines - Daghang barangay ang mialma sa gipagawas nga memorandum ni Cebu City Mayor Tomas Osmeña nga ang tanang tanod ug garbage collectors dili na makadawat og honorarium gikan sa dakbayan sugod Pebrero 1 gumikan sa problema sa panudlanan sa siyudad.
Si Tisa Barangay Captain ug Association of Barangay Council President Philip Zafra niingon nga ang gihimo sa mayor makapiang sa pagpatuman sa serbisyo sa kabarangayan.
Nanghinaot si Zafra nga susihon og balik sa Executive Department ang maong kamanduan kay matud pa dili kini makiangayon sa mga empleyado ingon man sa publiko. Makig-istorya usab siya sa City Budget Officer kay nasayod siya nga adunay pundo nga gitagana ang siyudad alang niini.
Samtang si Konsehal Joel Garganera miangkon nga nasurprisa siya sa maong memo kay matud pa ang paghatag og honorarium sa mga tanod ug garbage collectors gipaagi man og ordinansa.
Gumikan niini, wala gisalikway ni Garganera ang posibilidad nga adunay bulok politika ang lakang sa mayor. (BANAT NEWS)
- Latest
