Drug test sa mga magtutudlo sugdan na
CEBU, Philippines - Makasugod na ang Cebu Provincial Anti-drug Abuse Office (CPADAO) sa pagpahigayon og drug test sa mga magtutudlo sa pampublikong tunghaan sa Department of Education - Cebu Province Division.
Kini human naka-umol na ang DepEd ug ang Kapitolyo og assessment committee o Drug Free Workplace Committee. Ang maong komitiba, mao na lang ang gihuwat sa CPADAO aron makapahigayon na og drug test.
Matud ni Ivy Durano Meca ang pangulo sa CPADAO nga angayang adunay komitiba aron maoy mo-assess sa mga magtutudlo nga magpositibo sa drug test.
Dugang niini nga aduna nay komunikasyon ang DepEd Cebu Province sa ilang buhatan kabahin sa maong plano apan mag-agad sila sa request sa drug test sa maong ahensiya kun kanus-a ug asa nga eskwelahan kini ipahigayon. Asoy ni Meca nga ang DepEd maoy ilang pabut-on kun unsay silot nga ipahamtang sa mga magpositibong magtutudlo ug sa madesisyonan sa komitiba.
Ang tinguha nga mapaubos sa drug test ang mga magtutudlo subay kini sa mga taho kaniadto nga adunay mga magtutudlo sa lalawigan nga nalambigit sa ginadiling drugas. (BANAT NEWS)
- Latest