Napulo ka polis girelibohan

CEBU, Philippines - Walo ka mga polis sa Cebu City Police Office ug duha sa Talisay City Police Station ang giparelibohan sa ilang puwesto gumikan sa mga nagkadaiyang kaso ug reklamo nga ilang giatubang.

Si Sr. Supt. Joel Doria,  director sa CCPO mitug-an nga kabahin kini sa internal cleansing nga gihimo karon sa kapulisan.

Hinoon gipasabot ni Doria nga dili mga dagkung kaso ang giatubang sa maong walo ka mga polis ug wala kini nalambigit sa drugas. Sila girelibohan tungod sa accidental firing sa ilang armas, absent sa trabaho ug uban pa.

Sagad sa giatubang sa maong mga polis nag-atubang lang og less grave misconduct.

Ang maong mga polis nagdala og ranggo gikan police officer 1 hangtod senior police officer 1.

Si Doria miingon nga niadtong nakalabay nga tuig miabot sa 19 ka mga polis ang narelibohan sa puwesto tungod sa mga nagkadaiyang kaso nga giatubang.

Ang maong mga polis gidestino karon sa Police Holding and Accounting Unit (PHAU) samtang nagpadayon ang imbestigasyon sa ilang giatubang nga mga reklamo ug makabalik ra sila sa puwesto kun mahuman na ang ilang kaso.

Samtang gitug-an sa pangu sa kapulisan sa Dakbayan sa Talisay nga duha sa iyang mga sakop ang gilabay paingon ngadto sa Cebu Provincial Police Office (CPPO).

Kini gumikan sa mga report nga ang maong mga polis nalambigit sa kalihukan sa ginadiling drugas.

Hinuon si Supt. Emerson Dante nipasabot nga posible nga nasuyaan o nasaypan lang ang iyang mga sakop kay aduna gyu’y mga sitwasyon nga adunay masuko kanila hinungdan nga i-report dayun sila ngadto sa uluhang buhatan pinaagi lang sa text.

Asoy pa niya nga kun adunay mga report kabahin kaniya o sa iyang mga sakop hayan dali nga ila kining e-validate kun unsa ka tinuod.

Samtang si Chief Insp. Josephus Jelianggao, warden sa Talisay City Jail niingon nga usa sa iyang mga sakop ang iyang gibalhin sa probinsya sa Bohol tungod sa nigawas nga report nga kakunsabo niya ang mga piniriso pagpasulod og mga kontrabando.

Siya nagkanayon nga nalutsan sila og cellphone apan nakuha kini sa gihimo nilang greyhound operation. Jojo Ugdo ug Gabriel Bonjoc (BANAT NEWS)