Nagmotorsiklo gidaro sa SUV, patay

CEBU, Philippines - Gideklara nga dead on arrival sa mga doktor ang usa ka lalaki nga nalandig sa pribadong ospital sa North Reclamation Area sa Dakbayan sa Mandaue human nadaro sa SUV samtang nagmaneho sa iyang motorsiklo sa may dalan S. Osmeña pasado alas 8 sa nakalabay nga gabii.

Ang biktima kinsa nakaangkon og daghang pangos sa iyang kalawasan giila nga si Redden Aviles, 43, ulitawo, taga dalan Cabreros sa Brgy  Basak San Nicholas, Dakbayan sa Sugbo.

Ang nakabangga mao si Rolando Chy, 58, minyo ug taga Brgy Bulacao sa Dakbayan sa Talisay.

Sa gihimong imbestigasyon ni SPO1 Dominador Ungab sa Cebu City Transportation Office nasayran nga samtang paingon moliko ang SUV ni Chy paingon sa 13th Avenue, mibangga ang motorsiklo ni Aviles.

Tungod sa kakusog sa dagan sa motorsiklo, wala na makalikay sa sakyanan ug nadaro hangtud nga napasok si Aviles sa ilawom sa sakyanan.  Gidali og dala sa duol nga tambalanan ang biktima apan gideklarar kining patay na.

Kasamtangang natanggong sa prisohan si Chy ug posibleng kasuhan og reckless imprudence resulting to    homicide. Aldreth Cayas (BANAT NEWS)