Tommy nakigtagbo sa Chinese billionaire
CEBU, Philippines - Nakigtagbo kagahapon si Mayor Tomas Osmeña kang Chinese Billionaire Huang Rulun, Chairman ug Founder sa Century Golden Resources Group Corp.
Si Rulun, niabot sa Pilipinas niadtong Martes alang sa inagurasyon sa Mega Drug Abuse Treatment and Rehabilitation Center sa Fort Magsaysay, Nueva Ecija diin nidonar siya og P1.4 billion.
Gihulagway ni Mayor Osmeña nga usa ka “introductory meeting” ang nahitabo kagahapon sa maong business tycoon pinaagi sa ilang “common friends”.
Sigon niini nga gidawat ni Rulun ang iyang imbitasyon nga mobisita sa SRP diin adunay posibilidad nga mopakita kini og interes nga mo-invest.
Gipresentar ni Rulun ang profile sa ilang kompaniya. Gipakita sa maong presentasyon nga ang ilang kompanya nalakip sa China’s “Top 500 enterprises” 11 ka higayon gikan sa 2005. Usa kini ka comprehensive multi-industry international group diin ang mga negosyo naglakip sa real estate development.
Malaumon si Osmeña nga ang maong panagtagbo moresulta sa future investment ilabi na nga usa ka impluwensiyadong tawo si Rulun ug ang kompaniya niini.
Base sa Forbes, si Rulun adunay $3.4 billion net worth nga maoy hinungdan nga nalandig kini sa ika-49 nga labing datu sa China. (BANAT NEWS)
- Latest
