Konsehal Emit gireklamo sa iyang mga silingan

CEBU, Philippines - Nagpanon sa buhatan ni Mayor Eduardo Gullas ang mga silingan ni Konsehal Doroteo Emit sa Sitio Cainta, Barangay Pooc, dakbayan sa Talisay, aron ireklamo ang konsehal nga nisira sa gipanag-iya niining dalan nga naandan na nilang agianan.

Niadtong Domingo, usa ka sakyanan nga gipanag-iya sa usa ka residente ang nagbabag sa karsada human iya kining gibiyaan kay dili man siya makasulod sa karsada nga gibutangan og gate.

Naabot pa sa punto nga nitawag og polis si Emit aron mahilot ang nahitabong tensyon.

Matud ni Raquel Bumaya, usa sa mga residente nga gipili lang ni Emit ang mga tawo nga mahimong makaagi sa gipanag-iyang luna. Asoy niya nga may kalabotan sa politika ang nahitabo sa ilang lugar kay wala man sila nisuporta ni Emit sa niaging eleksyon.

Si Emit nagkanayon nga iyang gisirad-an ang maong karsada kay iya man ang luna. Siya niasoy nga aduna gyuy barangay road alang sa mga residente apan adunay usa ka pamilya nga nitukod og balay sa yuta nga iya sa barangay hinungdan nga iya kining gipasakaan og kaso ug iyang giablihan ang iyang luna alang sa mga tawo aron makaagi.

Matud niini nga nakadaug siya sa kaso apan niapelar ang iyang gikiha. Iyang gitataw nga gisirad-an niya ang luna nga iyang gipanag-iya kay natandog siya sa gisumbong sa mga residente sa lugar nga adunay usa ka tawo nga nisira sa iyang luna ug dili man gani magpaagi sa usa ka bakol.

Tungod niini, aduna nay tensyon ang silingan ni Emit sa luyo hinungdan nga nidangop ang mga tawo kaniya. Atol sa ilang panagtagbo, giingong arogante ang maong tawo hinungdan nga nihangyo kaniya ang mga residente nga koralon sab ang iyang luna nga maoy ilang gi-agian ug kadtong maong tawo nga arogante dili paagion. Asoy pa ni Emit nga gusto sab niya nga sirad-an ang ilang lugar ug butangan og guwardiya kay daghan sa iyang customer sa gipanag-iyang resort ang gipangtulis.  Ang mga residente gitambagan nga mohimo og pormal nga reklamo aron matagaan og aksyon sa buhatan sa mayor. (BANAT NEWS)