“Maximum tolerance” ipatuman sa anti-Marcos rally
CEBU, Philippines - Andam na ang kapolisan sa himoon nga Anti-Marcos Rally nga planong ipahigayon karong adlawa sa dakbayan sa Sugbo isip pag-protesta sa paglubong kang kanhi presidente ug diktador Ferdinand Marcos sa Libingan ng Mga Bayani. Matud ni PRO-7 director Noli Taliño nga andam na ang Crowd Dispersal Management Team sa kapolisan sa dakbayan, probinsya ug gikan sa Regional Public Safety Batallion-7.
Sumala pa ni Taliño nga ilang ipatuman ang “maximum tolerance” atol sa maong kalihokan. Iyang gipanawagan sa mga muapil sa rally nga himoon kini nga hapsay ug malinawon ug likayan ang bisan unsa nga paagi aron makahatag og kagubot.
Gipasabot sa opisyal nga wala silay na-monitor nga bisan unsa nga grupo nga gustong mosakay sa maong kalihukan aron manggubot. Bugtong niyang nahibaw-an mao ang lihok protesta batok sa paglubong ni Marcos sa LNMB. (BANAT NEWS)
- Latest