Gubat batok VAWC gihangop ni Magpale
CEBU, Philippines - Gihangop ni Bise Gobernador Agnes Magpale ang pamahayag ni Presidente Rodrigo Duterte nga human sa gubat batok ginadiling drugas isunod niya ang problema sa Violence Against Women and Children (VAWC).
Matud ni Magpale nga sukad pa kaniadto ang iyang adbokasiya ug gilauman nga sa maong pagpakabana sa Presidente sa nasud mahunong na ang pagpangabuso sa kababayen-an ug kabataan.
Nunot sa moderno na nga pagpangabuso sa kabataan ug kababayen-an, naglaum si Magpale nga mapauswag usab ang teknolohiya sa pagsikop sa mga nalambigit sa pagpangabuso.
Sumala pa ni Magpale nga nagsalig pa gihapon sila karon sa Homeland Security sa Amerika sa pagsikop sa mga suspek sa pagpangabuso ilabi na kung langyaw tungod kay dili pa kompleto ang probinsiya sa mga high-tech nga gadgets.
Nanghinaut sab si Magpale nga magahinan og saktong pundo sa nasudnong kagamhanan ang mga high-tech nga gadgets sa paggukod sa mga nalambigit sa krimen. (BANAT NEWS)
- Latest
