Kapitan nikisi-kisi sa pasangil nga ‘drug protector’

CEBU, Philippines - Nikisi-kisi ang kapitan sa Barangay Tanke, Dakbayan sa Talisay sa pamahayag sa hepe sa kapolisan, Supt. Emerson Dante, nga may opisyal sa barangay nga protektor sa ilegal nga drugas.

Tungod niini si Mayor Eduardo Gullas makigkita kang Dante aron klaruhon ang pamahayag niini nga dili masulbad ang ginadiling drugas sa lugar tungod kay adunay mga opisyal nga giingong protektor.

Hinuon wala nganli ni Dante ang maong opisyal.

Nagtuo si Gullas nga may gibasehan si Dante sa iyang pamahayag sanglit wala siyay makuha kung magtumo-tumo lang siya.

Pakig-estoryahan sab ni Gullas si Barangay Kapitan Perla Cabanes labot sa pamahayag ni Dante.

Matud ni Gullas nga tungod sa kadugay na nila sa barangay hayan masuod na ang mga tawo nga mga ilegalista hangtud nga ila tabunan ang dili maayo nga binuhatan.

Dugang niya nga dili siya manalipod o molaban sa mga opisyal sa gobiyerno nga nalambigit og ilegal nga drugas. Samtang tulo ka lalaki nga nalambigit sa ilegal nga drugas ang nasikop sa kapolisan sa managlahing barangay sa Dakbayan sa Talisay.

Unang gironda sa kapolisan ang Sitio Rattan, Tanke diin ilang nasikop si Jemar Omayan alyas Emar, 31-anyos, ulitawo, kinsa nakuhaan og 28 ka gagmay nga pakete sa shabu nga adunay timbang nga 1.45 gramos nga mobalor og P17,200.

Alas 4:49 sa hapon, nisulod ang mga awtoridad sa Sitio Ilang-Ilang, Lagtang human ilang nasuta nga usa ka alyas Pado ang namaligya og ginadiling drugas.

Si Pado nailhan nga si Laroski Navaja, 40, ulitawo nga nagpuyo sa maong lugar.

Ang bata-bata niini nga si Edcel Navaja, hingkod, nalakip sab sa pagkasikop.

Nakuhaan sila og 30 ka gagmay nga pakete sa shabu nga may timbang nga .93 gramos nga adunay kantidad nga P10,230.

Ang mga dinakpan ang nag-abot sa bilangguan ug gipasakaan na og kaso. (BANAT NEWS)