Brgy Dunggoan, Danao City

"Naunsa naman ang agas sa tubig diri sa among lugar, wala may klaro kay sige man lang kawagtang ang agas. Naproblema na kaayo mi diri kay apektado ang among inadlaw nga panginahanglan."

 Brgy Punta Princesa, Cebu City

"Magpatabang unta mi bahin niining usa ka tawo nga namaligya’g shabu diri gyud sa Sitio Enriquez. Wala gyud ni siya madakpi bisan sa kadugay na niya nga pamaligya’g shabu."

Brgy Canduman, Mandaue City

"Wala man tiwasa pagtrabaho ang taytayan diri sa may Tintay. Igo ra man giguba ang concrete railings unya wala na balika’g trabaho.

 Brgy Tayud, Liloan, Cebu

"Kanang traffic enforcer nga nadestino sa Capulay dapit, nganong gibutang man na diha nga dili man kamao. Imbes makapahapsay sa traffic mao naman hinoon ang makamugna’g problema sa mga motorista."

 Brgy Bago, Asturias, Cebu

"Amo lang unta ireklamo ang poultry farm diri sa Sitio Baswang kay grabe na ang pagdagsang sa mga langaw. Magmusketero na gud mi nga mangaon kay mouna man og tugdon ang mga langaw sa pagkaon namo.

 Brgy San Vicente, Liloan, Cebu

"Jun maayo unta’g tarungon na sa gobiyerno ang karsada namo diri hangtod na sa may Tabay kay dagko kaayo’g mga libaong, kuyaw kaayo sa disgrasya, labi na kun ting-uwan kay dangog man kaayo ang karsada."

 Brgy Agus, Lapu-Lapu, City

"Kining dalan diri sa Deca Homes 1 kay giguba sa contractor unya wala na  gyud balika og trabaho. Dugay na kaayo ni nga giguba ug nakahasol na kaayo namo nga moagi sa maong lugar."

 Brgy Zapatera, Cebu City

"Wala may magkuha kanunay sa basura diri sa may creek side dapit, daghan kaayong mga basura nga magpundok. May konsehal man unta sa barangay nga nagpuyo diri sa among lugar, pero wala may nakasulbad sa maong problema."

 Brgy Bankal, Lapu-Lapu City

"Sa Sitio Colis nagpadayon man gihapon ang pagpamaligya’g shabu hasta manuyopay. Wa’y mga respeto kay bisan og daghang makakita nga mga tawo apil na ang mga bata anha lang maghinatagay og shabu sa daplin."

 Brgy Hagnaya, San Remigio, Cebu

"Among ireklamo ang PAWASCO kay ang serbisyo sa patubig diri sa among dapit wa gyuy klarong agas. Grabi gyud ang pag-antos namo niining ilang serbisyo nga unta husto man mi sa bayad pero mga sakop sa BOD wa gyuy pakabana sa among reklamo."

 Brgy Buhing-Tubig, Pinamungajan, Cebu

"Magpatabang unta kami bahin sa tig-supply namo’g tubig ngari kay wala man gihapoy agas nga dagko kaayo mi’g gasto pagpalinya sa tubo sa tubig paingon sa among balay. Amo untang ipasusi kay basin giilad ra mi sa nagdumala sa patubig namo diri."

Alang sa inyong mga reklamo text lang sa 09326425494