Bag-ong warden sa CPDRC interbyuhon
CEBU, Philippines – Ipaubos sa interbyu ni Gobernador Hilario Davide III ang aplikante sa pagka-warden sa Cebu Provincial Detention and Rehabilitation Center karong adlawa.
Kini human gi-abisohan sa gobernador ang iyang assistant jail warden nga si Bobby Legaspi nga mag-vacation leave una. Si Davide nikompirmar nga niduso na og resignation letter kaniya si Legaspi tungod sa personal nga rason niini nga wala gibutyag sa gobernador apan wala usab kini niya dawata.
"I need him. He's been doing well and in fact he's been very helpful nako sa CPDRC," matud ni Davide.
Sumala pa sa gobernador nga karon nga on-leave si Legaspi, kinahanglan siya og ikapuli.
Si Legaspi gitahasan ni Davide nga motan-aw sa CPDRC human niluwat sa katungdanan ang kanhi consultant ingon man ang warden.
Si Davide nagkanayon nga nagpabilin hinoon ang mga bag-ong polisiya sa CPDRC pag-abot sa dalaw ug ingon man ang temporaryong pagsirado o dili pagdawat una og piniriso tungod sa kahuot na sa mga selda.
Ang Kapitolyo nagplano nga motukod og dugang selda sa CPDRC aron maluag-luag na ang ubang selda tungod sa kahuot. Sa pagkakaron adunay 2,883 ka piniriso nga anaa karon sa maong provincial jail. - /GMR) (BANAT NEWS)
- Latest
