Naningil sa bayad sa shabu sikop

CEBU, Philippines - Kapin sa P400 mil nga gituohang shabu ang nasakmit sa kapolisan sa duha ka managlahing pagpangronda nga gihimo sa nakalabay nga adlaw sa Lungsod sa San Francisco.

Atol sa maong operasyon tulo ka tawo ang nadakpan lakip sa “number one target list” nga naglihok sa negosyo sa drugas sa lungsod.

Matud ni Insp. John Libres, hepe sa San Francisco Police Station, nga unang nadakpan nila ang magsuon nga sila si Reymond Wenceslao, 25 ug Argie Wenceslao, 23, alas 10 sa buntag sa Sitio Kanlusong, Barangay San Isidro.

Nakuha sa mga polis gikan sa magsuon ang daghang pinaketeng shabu nga kantidad og P186, 640.

Nasayran gikan sa magsuon nga gikan sa usa ka James Mark Sampan alyas Mac-mac, 19, number one target list sa kapolisan sa lungsod, ang drugas.

Sa cellphone ni Reymond nakita sa kapolisan ang text message gikan ni Sampan nga naningil sa bayad sa shabu.

Didto nakaplano ang kapolisan ug gitubayan sa text ang suspek nga mokuha pa sila og dugang supply sa shabu ug gihimo ang buy-bust operation hinungdan sa pagkasikop ni Sampan kinsa nakuhaan og daghang shabu nga kantidad og P296, 770.

Matud ni Libres nga 17-anyos pa lang si Sampan nagsugod na sa pagpamaligya og shabu isip usa ka mamarokay hangtud nga kini nahanas na ug mao na ang namaligya sa ilang lungsod apan idlas kaayo sa kapolisan.

Suway pa unta gipatug-an si Sampan kung asa gikan ang supply sa shabu apan wala gyud kini gihatag nga impormasyon.

Samtang nilikay sa checkpoint nasikop sa Pulpogan, Lungsod sa Consolacion ug nakuhaan og armas nga kalibre .38 alas 10 pasado  sa niaging gabii.

Si PO1 Raymond Lleve sa Consolacion Police Station niila sa nadakpan nga si Carlo Cuajao, 28, taga Poblacion Oriental sa maong lungsod.

Sa District 4, Pulpogan sa mao gihapon nga lungsod, usa ka inahan nga si Mary Villarin, 49-anyos, ang nangayo’g panabang sa kapolisan human ang 20-anyos nga anak nga si Armado Villarin nga adik sa paggamit sa ilegal nga drugas ang kalit lang nag-wild nga nagdala og kutsilyo.

Matud ni Lleve nga nangayo og kwarta ang anak nga ipalit og shabu ug dihang gibalibaran kalit lang nag-wild pinaagi sa pagpamuspos sa ilang mga butang.

Si Lleve niingon nga ang mga barangay tanod maoy dali nga nakatubag sa alarma ug nakuha gikan niini ang kutsilyo. (BANAT NEWS)