Osmeña midangop sa kapolisan
CEBU, Philippines - Pormal nga nagpa-blotter si Cebu City Acting Mayor Margarita “Margot” Osmeña sa Cebu City Police Office (CCPO) ganihang buntag batok sa 44 ka mga barangay kapitan nga wala mouli sa mga sakyanan aron pag-imbentaryo.
Gihatagan pa og panahon ni Osmeña ang mga kapitan niadtong Martes aron pagsanong apan hangtud kagahapon wala sila molihok.
Sa pakighinabi ni Osmeña sa mga tigbalita human kini mopasaka og reklamo ngadto sa Investigation and Detective Management Branch, siya miingon nga una pa niya kining lakang batok sa mga kapitan nga wala mituman sa iyang mando.
“But this is the first step…because I am not a lawyer, we will see what the next move is, we can always see what charges we can file,” matud pa ni Osmeña. Giklaro ni Osmeña nga ang pag-recall sa mga sakyanan sa barangay alang unta sa pag-audit lamang.
Dugang pa ni Osmeña nga adunay 44 ka barangay ang wala mituman sa iyang mando. Aduna pay 59 ka mga sakyanan nga wala maapil sa pag-audit niini.
“Naa pay mga barangay nga wala pa iuli dili tuod pasabot niana nga tagsa tagsa lang og barangay naay mga uban barangay more than one vehicle,” dugang pa niya.
Subay niini mangayo og tabang si Osmeña ngadto sa City Attorney’s Office kung unsay angayan nga lakang nga buhaton kun dili gihapon motuman ang mga kapitan. Suspendidong Bise Mayor Edgardo Labella una na miingon kang Osmeña nga dili ipadayon ang pagsang-at og reklamo tungod kay ang mga sakyanan nga anaa sa barangay gamiton para sa mga emergency. (BANAT NEWS)
- Latest
