Lalaki nagdala og armas sa korte sikop
CEBU, Philippines - Nadakpan sa mga sakop sa Mabolo Police Station ang usa ka lalaki nga nagdala og pistola sulod sa Qimonda Building diin nahimutang ang Cebu City Hall of Justice sa North Reclamation Area pasado alas 2 sa nakalabay nga hapon.
Ang dinakpan giila nga si Mark Solon, 26, taga Barangay Guadalupe, kinsa nakuhaan og .45 caliber pistol nga duna’y walo ka bala.
Matud ni Senior Police Officer 4 Roldan Paller, desk officer sa Mabolo Police Station, nga nagsuot og fatigue uniform nga karsones ang suspek diha’ng nisulod sa building.
Usa ka tawo ang nakabantay nga dunay dala nga armas ang lalaki hinungdan nga dali kini nga nitug-an sa mga polis nga nadestino sa mao’ng dapit.
Tayming usab nga may polis sa Mabolo nga nagtambong og hearing sa kaso hinungdan nga ila’ng nadakpan si Solon kinsa wala usab nipakita og pagsukol.
Ang suspek nitug-an nga iya ra daw pangdepensa ang pistola apan wala kini nakapakita og lisensya.
Si Paller niingon nga delikado kaayo ang hitabo ug angayan nga imbestigaran ang mga guwardiya ngano’ng nakasulod ang armado sanglit sila nga polis nga mosulod ibilin man ang armas.
Kaso’ng paghupot og ilegal nga armas ang ipasaka sa kapolisan batok sa suspek kinsa kasamtangang gipaslak sa selda sa Mabolo Police Station. (BANAT NEWS)
- Latest
